somero 2010

Varmega aŭgusto

Ĵaŭdo, Aŭgusto 18, 05h15

Lastatempe mi fartis malbone, tre eble pro okupiteco de kromaj aferoj. Koincide paneis la ekrano de mia komputilo. Ĉu iu malbenis min?

Preparo de libro-kunsido

Merkredo, Aŭgusto 19, 05h52

Hieraŭ mi verkis kelkpaĝan dokumenton pri la romano “Monakino kaj Arko de Kupido”, por kunsido de mia libro-klubo. Kutime en kunsido, ĉirkaŭ ses junuloj argumentas pri unu aŭ du libroj.

Ankaŭ hodiaŭ mi verkas pri la novelo “Kikotowa”. Tie mi argumentas pri la strukturo de la rakonto kaj frazoj.

Vizito al Tokio

Lundo, Aŭgusto 23, 18h30 [mod. junio 15a 2017]

Antaŭhieraŭ, invitite de Sakagami, mi partoprenis lian kampadan bankedon. La bankedejo apud rivero estis naturriĉa, kvankam en la gubernio Tokio. La partoprenantoj krom tri homoj ne estis miaj konatoj, sed ni tuj amikiĝis kaj kune plonĝis en la riveron.

Mi donacis sepiajn piedojn por ke ni kuiros por la bankedo. Dum la kuirado kaj bankedo, ni babilis ĉefe pri libroj eldonitaj en lastaj monatoj. Ankaŭ post la bankedo, ni pasigis gajan tempon kun ridoj en familiara atmosfero. Domaĝo estis nur tio, ke moskitoj multe pikis mian korpon. Mi tranoktis kun tri viroj ĉe la domo de unu el ili.

Mi forlasis la domon frumatene. Por preni mian pakaĵon, mi kun Sakagami reiris al lia domo. Post matenmanĝo ĉe nudela manĝejo (li ĉiam manĝas ĉin-nudelon), mi ĝisrevidis kun li, kaj veturis per trajno al la kvartalo Sinzyuku por vidi malnovan amikinon Osiki.

Post tagmanĝo, ni babilante promenis de budo al budo en la granda butiko Sekaidoo, kie oni vendas multajn materialojn por belartoj. Ŝi, la belarta studentino, instruis al mi montrante diversajn materialojn kaj ilojn. Troviĝis farboj, gipsaj kapoj kaj tiel plu. Kvankam ni apneaŭ vizitis unu la alian, nia amikeco daŭras jam dek jarojn.

Vespere, post du- aŭ tri-hora veturado, mi revenis hejmen.

Signifo fari rakonton

Mardo 24-a 02h24 [mod. junio 15a 2017]

En la ĵusa momento, mi konsciis, ke aĉa antaŭjuĝo regis min, pro kio mi fuŝus mian faraĵon.

Mia temo ne estas “kiel lerte esprimi”, sed “kion doni al legantoj per la faraĵo”. Tiuj, kiuj verkas, devas eltiri sin el narcisismo kaj nervozeco, kiuj akompanas meditadon. Alie, verkantoj eble rigardus verkadon kiel sian privilegion.

Mi kovu plu mian unuan intencon, ke per rakontoj mi donu kuraĝon al iusence izolitaj infanoj.

Zorgo

Merkredo 25-a 01h27 [mod. julio 22a 2017]

Kio estas bona vivo? Mi ofte maltrankvile ekzorgos pri mia estonteco, dum mi konsumas multe da tempo por verki novelojn. De tempo al tempo mi imagas, ke se mi subite perdos kapablon verki novelojn… Ĉi tiaj mizeraj vortoj falas el la buŝo ekster mia intenco, kiam mi kalkulas monon en la monujo.

Ventrodoloro kaj moko

Ĵaŭdo, Aŭgusto 26, 00h31 [mod. julio 22a 2017]

Mia ventro akre doloras, kvankam mi devas legi kelke da libroj ĝis postmorgaŭ.

Por konversacio mi ne uzas ornamitajn vortojn, sed pri tio iuj malsimpatiaj homoj mokis min. Pro la indigno mi volus demandi ilin, ĉu permesata estas nur pedanta konversacio. Ĉu mi ne havas alian eblecon krom vivi en izolita insulo, por eskapi el iliaj mokoj?

Sendorma tago

Vendredo, Aŭgusto 27, 01h29 [mod. julio 22a 2017]

Mi kun amikino vizitis malsanulejon por vidi nian komunan amikinon Suu. Sed oni ne permesis al ni viziti la ĉambron pro ŝia sanstato. Antaŭ ol reiri hejmen, ni vizitis belartan muzeon proksime de la malsanulejo.

La artaĵoj konsolis mian koron, kaj samtempe profundigis mian penson. Sed mia cerbo estis dormema, ĉar mi ne dormis en la nokto, kaj medito de la cerbo naskis groteskajn imagojn, kiuj kaprice flugis tien kaj ĉi tien.

Hodiaŭ mi legis la novelon “Denunco de fraŭlino” verkita de Akazome Akiko, kun admiro al la beleco de la frazoj.

Libro-kunsido

Sabato, Aŭgusto 28, 03h54 [mod. julio 22a 2017]

Mi ĵus elfaris dokumenteton por la morgaŭa libro-kunsido. Daŭre hodiaŭ mankos al mi dormo, ĉar matene mi devos rete sendi ĝin al la ĉeestantoj. Mi zorgas, ĉu la kunsido bone iros.

Post la kunsido

Dimanĉo, Aŭgusto 29, 15h46 [mod. julio 22a 2017]

Hieraŭ okazis la libro-kunsido en Tokio. Kvankam mi frue ekiris de hejmo je la tagmezo, sed mi iom malfruiĝis por la kunsido, kiu komenciĝis je la 15a.

La temoj estis la du libroj: “Monakino kaj pafarko de kupido” de Tawada Yôko, kaj “Kikotowa” de Asabuki Mariko. Asabuki, la aŭtorino de la lasta, estas membro de nia klubo, kaj ĉeestis en la kunsido.

La kunsido fermiĝis en sukceso. Precipe rilate al Kikotowa, ni bone argumentis ankaŭ pri la enhavo; en gazetoj oni pritraktas ĝian stilon, sed neglektas mencii la enhavon de la rakonto, supozeble ĉar la novelo konsistas el okulkroĉaj, poeziecaj prozoj. Ĉiuokaze, la konversacio pri literaturo kontentigis min.

Post la kunsido ni vespermanĝis en tajlanda restoracio. Tie mi legis parton de la romano “Omon Ra” de Viktor Pelevin, kiun Sakagami rekomendis kiel temon por la venonta kunsido. Kiam mi trovis en ĝi la nomon de A. Tolstoj, la aŭtoro de “Aelita”, mi tuj decidis aĉeti la libron. Ĉu ĝi haveblas en aŭ ĉirkaŭ mia urbeto?

Genetiko kaj literaturo

Mardo, Aŭgusto 31, 01h53 [mod. julio 24a 2017]

Mi partoprenis en la duopa interparolo kun d-ro Siroisi, por loka radioprogramo. La interparolo okazis en artgalerio. Prezidis anoncisto, s-ino Koko. Kaj ĉeestis elsenda inĝeniero, s-ro Akiyama.

La interparolo temis pri literaturo kaj scienco. Ĉar la fako de la doktoro estas genetiko, la ĉeftemo en la tago estis “Ĉu eblas, ke vivaĵoj naskiĝas el nenieco”.

Ankaŭ post la programero, ni babilis du horojn kaj duonon. Lia parolo pri deveno de pando-muso estis interalie interesa.

Vespere en kafejo mi legis la novelon “La supereco (aŭ indiferenteco) de verkisto” verkita de Itoyama Akiko.

inserted by FC2 system